Hecyra

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Inscitum offerre iniuriam tibi immerenti iniquum est.
Ba.
  1. Est magna ecastor gratia de istac re quam tibi habeam:
  2. Nam qui post factam iniuriam se expurget, parum mihi prosit.
  3. Sed quid istuc est?
La.
  1. Meum receptas filium ad te Pamphilum.
Ba.
  1. Ah!
La.
  1. Sine dicam. Uxorem hanc prius quam duxit, vestrum amorem pertuli.
  2. Mane: nondum etiam dixi id quod volui. Hic nunc uxorem habet:
  3. Quaere alium tibi firmiorem, dum tibi tempus consulendi est;
  4. Nam neque ille hoc animo erit aetatem, neque pol tu eadem istac aetate.
Ba.
  1. Quis id ait?
La.
  1. Socrus.
Ba.
  1. Mene?
La.
  1. Te ipsam; et filiam abduxit suam;
  2. Puerumque ob eam rem clam voluit natus qui est extinguere.
Ba.
  1. Aliud si scirem qui firmare meam apud vos possem fidem
  2. Sanctius quam iusiurandum, id pollicerer tibi, Lache,
  3. Me segregatum habuisse, uxorem ut duxit, a me Pamphilum.
La.
  1. Lepida es; sed scin quid volo potius sodes facias?
Ba.
  1. Quid vis? cedo.
La.
  1. Eas ad mulieres huc intro, atque istuc iusiurandum idem
  2. Polliceare illis: exple animum iis, teque hoc crimine expedi.
Ba.
  1. Faciam; quod pol, si esset alia ex hoc quaestu, haud faceret scio,
  2. Ut de tali causa nuptae mulieri se ostenderet.
  3. Sed nolo falsa fama esse gnatum suspectum tuum,
  4. Nec leviorem vobis, quibus est minime aequum, viderier