Phormio

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Haec fient.
An.
  1. Ut modo fiant.
Ge.
  1. Fient: me vide.
  2. Pater exit: abi, die, esse argentum, Phaedriae.
DEMIPHO. GETA. CHREMES.
De.
  1. Quietus esto, inquam: ego curabo ne quid verborum duit.
  2. Hoc temere nunquam amittam ego a me quin mihi testes adhibeam:
  3. Cui dem, et quamobrem dem, commemorabo.
Ge.
  1. Ut cautus est, ubi nihil opus est!
Ch.
  1. Atqui ita opus facto est; at matura, dum libido eadem haec manet;
  2. Nam, si altera illaec magis instabit, forsitan nos reiciat.
Ge.
  1. Rem ipsam putasti.
De.
  1. Duc me ad eum ergo.
Ge.
  1. Non moror.
Ch.
  1. Ubi hoc egeris,
  2. Transito ad uxorem meam, ut conveniat hanc prius quam hinc abeat:
  3. Dicat nos dare eam Phormioni nuptum, ne succenseat;
  4. Et magis esse illum idoneum, qui ipsi sit familiarior;
  5. Nos nostro officio nihil digresses esse; quantum is voluerit
  6. Datum esse dotis.
De.
  1. Quid tua, malum, id refert?
Ch.
  1. Magni, Demipho.
De.
  1. Non satis est tuum te officium facere, si non id fama approbat.
Ch.
  1. Volo ipsius quoque voluntate hoc fieri, ne se eiectam praedicet.