Phormio

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Heri ad me venit. Erat ei de ratiuncula
  2. Iampridem apud me reliquum pauxillulum
  3. Nummorum; id ut conficerem. Confeci: affero.
  4. Nam herilem filium eius duxisse audio
  5. Uxorem: ei, credo, munus hoc corraditur.
  6. Quam inique comparatum est hi qui minus habent
  7. Ut semiper aliquid addant divitioribus.
  8. Quod ille unciatim vix de demenso suo,
  9. Suum defrudans genium, comparsit miser,
  10. Id illa universum abripiet, haud existimans
  11. Quanto labore partum. Porro autem Geta
  12. Ferietur alio munere, ubi hera pepererit;
  13. Porro autem alio, ubi erit puero natalis dies;
  14. Ubi initiabunt. Omne hoc mater auferet:
  15. Puer causa erit mittendi. Sed videon Getam?