Bacchides

Plautus, Titus Maccius

Plautus. Plauti Comoediae, Volume 1. Leo, Friedrich, editor. Berlin: Weidmann, 1895.

  1. quem tute dederas, ad eum ut ferret, filio.
Nic.
  1. Quid ubi ei ostendit symbolum?
Chrys.
  1. Infit dicere
  2. adulterinum et non eum esse symbolum.
  3. quotque innocenti ei dixit contumelias!
  4. adulterare eum aibat rebus ceteris.
Nic.
  1. Habetin aurum? íd mihi dici volo.
Chrys.
  1. Postquam quidem praétor recuperatores dedit,
  2. damnatus demum, vi coactus reddidit
  3. ducentós et mille Phílippum.
Nic.
  1. Tantum debuit.
Chrys.
  1. Porro etiam ausculta pugnam quam voluit dare.
Nic.
  1. Etiamnest quid porro?
Chrys.
  1. Em, áccipitrina haec nunc erit.
Nic.
  1. Deceptus sum, Autolyco hospiti aurum credidi.
Chrys.
  1. Quin tu audi.
Nic.
  1. Immo ingenium avidi haud pernoram hospitis.
Chrys.
  1. Postquam aurum abstulimus, in navem conscendimus,
  2. domi cupientes. forte ut adsedi in stega,
  3. dum circumspecto, átque ego lembum conspicor