Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. Seston et infaustos adgnoscent vellera fluctus
  2. vos etiam silvae, vos Colchidos hospitis orae,
  3. pandite, dives ubi pellis micet[*](micet C, misceat V ) arbore sacra.
  4. tunc tibi, fecundi proles Iovis, orte nivali
  5. Arcados axe deae, fluvio modo, Phasi, quieto
  6. Palladiam patiare rate, nec dona nec arae
  7. defuerint tellure mea; reverenda[*](reverenda Heinsius, uerenda V, ueneranda MT ) fluentis
  8. effigies te, Phasi, manet, quam magnus Enipeus
  9. et pater aurato quantus iacet Inachus antro.'
  10. dixerat,[*](Dixerat M, Dixit erat V ) atque illi dextra sine versa magistri
  11. protinus in proram rediit ratis omine certo
  12. fluminis os pontumque tuens. 'promittis ut ecce
  13. utque vocas, revehemur' ait. sic deinde precatus
  14. arma iubet celsa socios depromere puppe.
  15. dona dehinc Bacchi casusque ut[*](casusque ut Heinsius, casus qui V ) firmet in omnes
  16. rapta Ceres, viridesque premunt longo ordine ripas.
  17. Incipe nunc cantus alios, dea, visaque vobis
  18. Thessalici da bella ducis. non mens mihi, non haec
  19. ora satis. ventum ad furias infandaque natae
  20. foedera et horrenda trepidam sub virgine[*](uirgine V, imagine C ) puppem: