Argonautica

Valerius Flaccus, Gaius

Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.

  1. campus alit primae referentem cornua Phoebes
  2. indomitamque bovem, da carae[*](carae CM, caraxe V ) munera nuptae.
  3. ipsa ego dilectae pecudi iam pascua digna
  4. praecipuosque legam fontes." qua fraude negaret
  5. aut quos inventus finxisset Iuppiter astus?[*](inventus i. e. deprehensus | finxisset Peerlkamp, timuisset V, movisset Burmann (cfs. V 291 et Stat. Theb. XII 183) | aestus C )
  6. muneris illa potens custodem protinus Argum
  7. adiungit; custos Argus placet, inscia somni
  8. lumina non aliter toto cui vertice, quam si
  9. Lyda nurus sparso telas maculaverit ostro.
  10. Argus et in scopulos et monstris horrida lustra
  11. ignotas iubet ire vias heu multa morantem
  12. conantemque preces inclusaque pectore verba.
  13. ultima tum patriae cedens dedit oscula ripae;
  14. flevit Amymone, flerunt Messeides[*](Messeides Bon. 2, messonidaes, V messenides CT 1 ) undae,
  15. flevit et effusis revocans Hyperia lacertis.
  16. illa ubi vel fessi tremerent erroribus artus
  17. vel rueret summo iam frigidus aethere vesper,
  18. heu quotiens saxo posuit latus, aut ubi longa
  19. aegra siti, quos ore lacus, quae pabula carpsit,[*](crapsit V )
  20. verbere candentes quotiens exhorruit armos.