Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- fulmineus[*](Fulmineus M, Flumineus V ) quatit ora fragor, pelagoque remenso
- cauda redit, passosque sinus[*](passosque sinus C, passusque sinu V ) rapit ardua cervix.
- illam incumbentem per mille volumina pontus
- prosequitur lateri adsultans, trepidisque ruentem
- litoribus sua cogit hiems. non fluctibus aequis
- nubiferi venit unda Noti, non Africus alto
- tantus ovat patriisque manus cum plenus habenis
- Orion bipedum flatu mare tollit equorum.
- ecce ducem placitae furiis crudescere pugnae
- surgentemque toris stupet immanemque paratu
- Aeacides pulsentque graves ut terga pharetrae.
- ille patrem pelagique deos suaque arma precatus
- insiluit scopulo, motumque e sedibus aequor
- horruit et celsi[*](celsi M 2, celso V ) spatiosa volumina monstri.
- qualis ubi a gelidi Boreas convallibus Hebri
- tollitur et volucres Riphaea per ardua nubes
- praecipitat piceo necdum tenet omnia[*](omina C ) caelo,
- illa[*](Ille C ) simul molem horrificam scopulosaque terga
- promovet ingentique umbra subit. intremere Ide[*](Ide cod. regius, T, idem VC )
- inlidique rates pronaeque resurgere turres.[*](cf. Lucr. VI 561–564, 575 sq.)