Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- atque indignatos temerato litore reges
- mente agitet semperque metu decurrat ad undas
- arena ciens; mors sera viam temptataque claudat
- effugia et nostras nequeat praecurrere diras,
- sed reduces iam iamque viros auroque coruscum
- cernat iter. stabo insultans et ovantia contra
- ora manusque feram. tum, vobis siquod inausum
- arcanumque nefas et adhuc incondita[*](incognita plerique, sed cf. 531, Aetna 234 ) leti
- sors superest, date fallaci pudibunda senectae
- exitia indecoresque obitus. non Marte nec armis
- aut nati, precor, ille mei[*](nati om. V, hic add. M, post mei S ) dignatus ut umquam
- ense cadat; quae fida manus, quae cara suorum
- diripiat laceretque senem nec membra sepulchro
- contegat. haec noster de rege piacula sanguis
- sumat et heu cunctae quas misit in aequora gentes.'—[*](huc transtulit Iunt.1, post 822 habet V)
- adstitit et nigro fumantia pocula[*](pocula SM, procula V ) tabo
- contigit ipsa gravi Furiarum maxima dextra;
- illi avide exceptum pateris hausere cruorem.
- Fit fragor; inrumpunt foribus qui saeva ferebant
- imperia[*](foribus Heinsius, cf. II 220, sonitus V, sonitu S | ferebat Imperio V, corr. S ) et strictos iussis regalibus enses.