Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- o domus, o freti nequiquam prole penates.'[*](penates Balbus, nepotes V )
- dixit et extemplo furiis iraque minaci
- terribilis: 'sunt hic etiam tua vulnera,[*](uulnera SM, uulnere V ) praedo,
- sunt lacrimae carusque parens.' simul aedibus altis
- itque reditque fremens rerumque[*](rerumque Iunt. 1, regumque V ) asperrima versat:
- Bistonas ad meritos cum cornua saeva Thyoneus[*](Thyoneus Bon. 2, thyone VS )
- torsit et infelix iam mille furoribus Haemus,
- iam Rhodopes nemora alta gemunt, talem incita longis
- porticibus coniunxque fugit natique Lycurgum.
- Tartareo tum sacra[*](sacra SM 2, sacri V ) Iovi Stygiisque ferebat
- manibus Alcimede tanto super auxia nato,
- siquid ab excitis melius praenosceret umbris.
- ipsum etiam curisque parem talesque prementem
- corde metus ducit,[*](ducit Bon. 1, dicit V ) facilem tamen, Aesona coniunx.
- in scrobibus cruor et largus Phlegethontis aperti[*](scrobibus SM, sacro uibus V | operti C )
- stagnat honos, saevoque vocat grandaeva tumultu
- Thessalis exanimes atavos magnaeque nepotem[*](Thessalis M, Thessales V | nepotem M, nepote V )
- Pleiones. et iam tenues ad carmina vultus
- extulerat maestosque tuens natumque nurumque
- talia libato pandebat sanguine Cretheus:
p.27