Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- sed non, Iphi, tuis Argo reditura lacertis
- heu celerem Scythica te maesta relinquet harena
- cessantemque tuo lugebit in ordine remum.
- te quoque dant campi tanto pastore Pheraei
- felices, Admete; tuis nam pendit in arvis
- Delius, ingrato Steropen quod fuderat arcu.
- a quotiens famulo notis soror obvia silvis
- flevit, ubi Ossaeae captaret frigora quercus
- perderet[*](Penderet V scripserat, sed priore hasta n litterae sub linear deducta correxit | boebede V ) et pingui miseros Boebeide crines.
- insurgit transtris et remo Nerea versat
- Canthus, in Aeaeo volvet quem barbara cuspis
- pulvere; at interea clari decus adiacet orbis,
- quem genitor gestabat Abas: secat aurea fluctu
- tegmina Chalcidicas fugiens Euripus harenas,
- celsaque semiferum contorquens frena luporum
- surgis ab ostrifero medius, Neptune, Geraesto.[*](Geraesto Carr., gerasto V )
- at[*](at Burmann, Et V ) tibi Palladia pinu, Polypheme, revecto
- ante urbem ardentis restat deprendere patris
- reliquias, multum famulis pia iusta moratis,
- si venias. breviore petit iam caerula remo