Aeneid

Virgil

Vergil. The Bucolics, Aeneid, and Georgics Of Virgil. Greenough, J.B., editor. Boston: Ginn and Company, 1881.

  1. protinus hasta fugit servatque cruenta tenorem,
  2. dexteraque ex umero nervis moribunda pependit.
  3. Tum Numitor iaculo fratris de corpore rapto
  4. Aenean petiit; sed non et figere contra
  5. est licitum, magnique femur perstrinxit Achatae.
  6. Hic Curibus fidens primaevo corpore Clausus
  7. advenit et rigida Dryopem ferit eminus hasta
  8. sub mentum graviter pressa pariterque loquentis
  9. vocem animamque rapit traiecto gutture; at ille
  10. fronte ferit terram et crassum vomit ore cruorem.
  11. Tres quoque Threicios Boreae de gente suprema
  12. et tris, quos Idas pater et patria Ismara mittit,
  13. per varios sternit casus. Accurrit Halaesus
  14. Auruncaeque manus, subit et Neptunia proles,
  15. insignis Messapus equis. Expellere tendunt
  16. nunc hi, nunc illi; certatur limine in ipso
  17. Ausoniae. Magno discordes aethere venti
  18. proelia ceu tollunt animis et viribus aequis;
  19. non ipsi inter se, non nubila, non mare cedit;
  20. anceps pugna diu, stant obnixa omnia contra: