Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. exoranda canis tria sunt latrantia colla,
  2. scandendast torvi publica cumba senis.
  3. nec forma aeternum aut cuiquamst fortuna perennis:
  4. longius aut propius mors sua quemque manet.
  5. ille licet ferro cautus se condat et aere,
  6. mors tamen inclusum protrahit inde caput.
  7. Nirea non facies, non vis exemit Achillem,
  8. Croesum aut, Pactoli quas parit umor, opes.
  9. at tibi nauta, pias hominum quo traicit umbras,
  10. huc animae portet corpus inane tuae:
  11. qua Siculae victor telluris Claudius et qua
  12. Caesar, ab humana cessit in astra via.
  1. Obicitur totiens a te mihi nostra libido:
  2. crede mihi, vobis imperat ista magis.
  3. vos, ubi contempti rupistis frena pudoris,
  4. nescitis captae mentis habere modum.
  5. flamma per incensas citius sedetur aristas,
  6. fluminaque ad fontis sint reditura caput,
  7. et placidum Syrtes portum et bona litora nautis
  8. praebeat hospitio saeva Malea suo,