Elegiae

Propertius, Sextus

Propertius. Sex. Propertii Elegiae. Müller, Lucian, 1836-1898, editor. Leipzig: Teubner, 1898.

  1. cerne ducem, modo qui fremitu complevit inani
  2. Actia damnatis aequora militibus:
  3. hunc infamis arnor versis dare terga carinis
  4. iussit et extremo quaerere in orbe fugam.
  5. Caesaris haec virtus et gloria Caesaris haec est:
  6. illa, qua vicit, condidit arma manu.
  7. sed quascumque tibi vestis, quoscumque smaragdos,
  8. quosve dedit flavo lumine chrysolithos,
  9. haec videam rapidas in vanum ferre procellas:
  10. quae tibi terra, velim, quae tibi fiat aqua.
  11. non semper placidus periuros ridet amantis
  12. Iuppiter et surda neglegit aure preces.
  13. vidistis toto sonitus percurrere caelo,
  14. fulminaque aetheria desiluisse domo:
  15. non haec Pleiades faciunt neque aquosus Orion,
  16. nec sic de nihilo fulminis ira cadit;