Hecyra

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Sed videone ego Philotium? unde haec advenit?
  2. Philotis salve multum.
Ph.
  1. O salve Parmeno.
Sy.
  1. Salve mecastor Parmeno.
Pa.
  1. Et tu edepol Syra.
  2. Dic mihi, Philotis, ubi te oblectasti tam diu?
Ph.
  1. Minime equidem me oblectavi, quae cum milite
  2. Corinthum hinc simul profecta inhumanissimo:
  3. Biennium ibi perpetuum misera illum tuli.
Pa.
  1. Edepol te desiderium Athenarum arbitror,
  2. Philotium, cepisse saepe, et te tuum
  3. Consilium contemsisse.
Ph.
  1. Non dici potest
  2. Quam cupida eram huc redeundi, abeundi a milite,
  3. Vosque hic videndi, antiqua ut consuetudine
  4. Agitarem libere inter vos convivium;
  5. Nam illi haud licebat nisi praefinito loqui
  6. Quae illi placerent.
Pa.
  1. Haud opinor commode
  2. Finem statuisse orationi militem.
Ph.
  1. Sed quid hoc negoti est modo quae narravit mihi
  2. Hic intus Bacchis? quod ego nunquam credidi
  3. Fore ut hac ille viva posset animum inducere
  4. Uxorem habere.