Phormio

Terence

Terence. Publii Terentii Comoediae Sex. Parry, Edward St. John, editor. London: Whittaker and Co.; George Bell, 1857.

  1. Exsequias Chremeti quibus est commodum ire hem tempus est.
  2. Sic dabo: age nunc, age, Phormionem qui volet lacessito.
  3. Faxo tali eum mactatum atque hic est infortunio.
  4. Redeat sane in gratiam: iam supplici satis est mihi:
  5. Habet haec ei quod dum vivat usque ad aurem ogganniat.
Na.
  1. At meo merito, credo: quid ego nunc commemorem, Demipho,
  2. Singulatim qualis ego in hunc fuerim?
De.
  1. Novi aeque omnia
  2. Tecum.
Na.
  1. Meritone hoc meo videtur factum?
De.
  1. Minime gentium;
  2. Verum, quando iam accusando fieri infectum non potest,
  3. Ignosce: orat; confitetur; purgat: quid vis amplius?
Ph.
  1. Enimvero prius quam haec dat veniam, mihi prospiciam et Phaedriae.
  2. Heus, Nausistrata, prius quam huic respondes temere, audi.
Na.
  1. Quid est?
Ph.
  1. Ego minas triginta per fallaciam ab illo abstuli;
  2. Eas dedi tuo gnato; is pro sua amica lenoni dedit.
Ch.
  1. Hem, quid ais?