Pseudolus

Plautus, Titus Maccius

Plautus. Leo, Friedrich

  1. Horum causa haec agitur spectatorum fabula:
  2. hi sciunt, qui hic adfuerunt; vobis post narravero.
Cal.
  1. Quid nunc agimus?
Ps.
  1. Liberam hodie tuam amicam amplexabere.
Cal.
  1. Egone?
Ps.
  1. Tu istic ipsus, inquam, si quidem hoc vivet caput;
  2. si modo mihi hominem invenietis propere.
Char.
  1. Qua facie?
Ps.
  1. Malum,
  2. callidum, doctum, qui quando principium prehenderit,
  3. porro sua virtute teneat quid se facere oporteat;
  4. atque qui hic non visitatus saepe sit.
Char.
  1. Si servos est,
  2. numquid refert?
Ps.
  1. Immo multo mavolo quam liberum.
Char.
  1. Posse opinor me dare hominem tibi malum et doctum domo,
  2. qui a patre advenit Carysto nec dum exiit ex aedibus
  3. quoquam neque Athenas advenit umquam ante hesternum diem.
Ps.
  1. Bene iuvas. sed quinque inventis opus est argenti minis
  2. mutuis, quas hodie reddam: nam huius mihi debet pater.