Miles Gloriosus

Plautus, Titus Maccius

Plautus. Plauti Comoediae, Volume 2. Leo, Friedrich, editor. Berlin: Weidmann, 1896.

  1. comoediai quam nos acturi sumus
  2. et argumentum et nomen vobis eloquar.
  3. Alazon Graece huic nomen est comoediae,
  4. id nos Latine gloriosum dicimus.
  5. hoc oppidum Ephesust; illest miles meus erus,
  6. qui hinc ad forum abiit, gloriosus, impudens,
  7. stercoreus, plenus periuri atque adulteri.
  8. ait sése ultro omnis mulieres sectarier:
  9. is deridiculost, quaqua incedit, omnibus.
  10. itaque hic meretrices, labiis dum ductant eum,
  11. maiorem partem videas valgis saviis.
  12. nam ego hau diu apud hunc servitutem servio;
  13. id volo vos scire, quo modo ad hunc devenerim
  14. in servitutem ab eo cui servivi prius.
  15. date operam, nam nunc argumentum exordiar.
  16. erat erus Athenis mihi adulescens optumus;
  17. is amabat meretricem --- matre Athenis Atticis,
  18. et illa íllum contra; qui est amor cultu optumus.
  19. is publice legatus Naupactum fuit
  20. magnai rei publicai gratia.