Cathemerina
Prudentius
Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).
- Quicumque Christum quaeritis,
- oculos in altum tollite:
- illic licebit visere
- signum perennis gloriae.
- haec stella, quae solis rotam
- vincit decore ac lumine,
- venisse terris nuntiat
- cum carne terrestri Deum.
- non illa servit noctibus
- secuta lunam menstruam,
- sed sola caelum possidens
- cursum dierum temperat.
- Arctoa quamvis sidera
- in se retortis motibus
- obire nolint, attamen
- plerumque sub nimbis latent.