Cathemerina

Prudentius

Prudentius, Volume 1. Thomson, H. J, editor. London; Cambridge, Mass.: William Heinemann Ltd., Harvard University Press, 1949 (printing).

  1. o sancta praesepis tui,
  2. aeterne rex, cunabula,
  3. populisque per saeclum sacra
  4. mutis et ipsis credita!
  5. adorat haec brutum pecus,
  6. indocta turba scilicet,
  7. adorat excors natio
  8. vis cuius in pastu sita est.
  9. sed cum fideli spiritu
  10. concurrat ad praesepia
  11. pagana gens et quadrupes,
  12. sapiatque quod brutum fuit,
  13. negat patrum prosapia
  14. perosa praesentem Deum:
  15. credas venenis ebriam,
  16. furiisve lymphatam rapi.
  17. quid prona per scelus ruis?
  18. agnosce, si quidquam tibi
  19. mentis resedit integrae,
  20. ducem tuorum principum.