Panegyricus dictus Manlio Theodoro consuli

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. materiae causas: quae vis animaverit astra
  2. impuleritque choros; quo vivat machina motu;
  3. sidera cur septem retro nitantur in ortus
  4. obluctata polo; variisne meatibus idem
  5. arbiter an geminae convertant aethera mentes;
  6. sitne color proprius rerum, lucisne repulsu
  7. eludant aciem; tumidos quae luna recursus
  8. nutriat Oceani; quo fracta tonitrua vento,
  9. quis trahat imbriferas nubes, quo saxa creentur
  10. grandinis; unde rigor nivibus; quae flamma per auras
  11. excutiat rutilos tractus aut fulmina velox
  12. torqueat aut tristem figat crinita cometem.
  13. Iam tibi compositam fundaverat ancora puppim,
  14. telluris iam certus eras; fecunda placebant
  15. otia; nascentes ibant in saecula libri:
  16. cum subito liquida cessantem vidit ab aethra
  17. Iustitia et tanto viduatas iudice leges,
  18. continuo frontem limbo velata pudicam
  19. deserit Autumni portas, qua vergit in Austrum
  20. Signifer et noctis reparant dispendia Chelae.