Panegyricus de sexto consulatu Honorii Augusti

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. aurea roranti micuerunt cornua vultu.
  2. non illi madidum vulgaris harundine crinem
  3. velat honos; rami caput umbravere virentes
  4. Heliadum totisque fluunt electra capillis.
  5. palla tegit latos umeros, curruque paterno
  6. intextus Phaethon glaucos incendit amictus.
  7. fultaque sub gremio caelatis nobilis astris
  8. aetherium probat urna decus. namque omnia luctus
  9. argumenta sui Titan signavit Olympo:
  10. mutatumque senem plumis et fronde sorores
  11. et fluvium, nati qui vulnera lavit anheli;
  12. stat gelidis Auriga plagis; vestigia fratris
  13. germanae servant Hyades, Cygnique sodalis
  14. lacteus extentas adspergit circulus alas;
  15. stelliger Eridanus sinuatis flexibus errans
  16. clara Noti convexa rigat gladioque tremendum
  17. gurgite sidereo subterluit Oriona.
  18. Hoc deus effulgens habitu prospexit euntes
  19. deiecta cervice Getas; tunc talia fatur:
  20. “sicine mutatis properas, Alarice, reverti