Panegyricus de quarto consulatu Honorii Augusti

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. Sed laudes genitor longe transgressus avitas
  2. subdidit Oceanum sceptris et margine caeli
  3. clausit opes, quantum distant a Tigride Gades,
  4. inter se Tanais quantum Nilusque relinquunt:
  5. haec tamen innumeris per se quaesita tropaeis,
    6. v.1.p.290
  6. non generis dono, non ambitione potitus.
  7. digna legi virtus, ultro se purpura supplex
  8. obtulit et solus meruit regnare rogatus.
  9. nam cum barbaries penitus commota gementem
  10. inrueret Rhodopen et mixto turbine gentes
  11. iam deserta suas in nos transfunderet Arctos,
  12. Danuvii totae vomerent cum proelia ripae,
  13. cum Geticis ingens premeretur Mysia plaustris
  14. flavaque Bistonios operirent agmina campos,
  15. omnibus adflictis et vel labentibus ictu
  16. vel prope casuris: unus tot funera contra
  17. restitit extinxitque faces agrisque colonos
  18. reddidit et leti rapuit de faucibus urbes.
  19. nulla relicta foret Romani nominis umbra,
  20. ni pater ille tuus iamiam ruitura subisset