In Rufinum

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. Pandite defensum reduces Helicona sorores,
  2. pandite; permissis iam licet ire choris:
  3. nulla per Aonios hostilis bucina campos
  4. carmina mugitu deteriore vetat.
  5. tu quoque securis pulsa formidine Delphis
  6. floribus ultorem, Delie, cinge tuum.
  7. nullus Castalios latices et praescia fati
  8. flumina polluto barbarus ore bibit.
  9. Alpheus late rubuit Siculumque per aequor
  10. sanguineas belli rettulit unda notas
  11. agnovitque novos absens Arethusa triumphos
  12. et Geticam sensit teste cruore necem.
  13. Inmensis, Stilicho, succedant otia curis
  14. et nostrae patiens corda remitte lyrae,
  15. nec pudeat longos interrupisse labores
  16. et tenuem Musis constituisse moram.
  17. fertur et indomitus tandem post proelia Mavors
  18. lassa per Odrysias fundere membra nives
  19. oblitusque sui posita clementior hasta
  20. Pieriis aures pacificare modis.