In Eutropium

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. arma relinque viris. geminam quid dividis aulam
  2. conarisque pios odiis committere fratres?
  3. te magis, ah demens, veterem si respicis artem,
  4. conciliare decet. Gestis pro talibus annum
    5. v.1.p.160
  5. flagitet Eutropius, ne quid non polluat unus,
  6. dux acies, iudex praetoria, tempora consul!
  7. Nil adeo foedum, quod non exacta vetustas
  8. ediderit longique labor commiserit aevi.
  9. Oedipodes matrem, natam duxisse Thyestes
  10. cantatur, peperit fratres Iocasta marito
  11. et Pelopea sibi. Thebas ac funera Troiae
  12. tristis Erechthei deplorat scaena theatri.
  13. in volucrem Tereus, Cadmus se vertit in anguem.
  14. Scylla novos mirata canes, hunc arbore figit,
  15. elevat hunc pluma, squamis hunc fabula vestit,
  16. hunc solvit fluvio. numquam spado consul in orbe
  17. nec iudex ductorve fuit! quodcumque virorum
  18. est decus, eunuchi scelus est. exempla creantur
  19. quae socci superent risus luctusque cothurni.
  20. Quam pulcher conspectus erat, cum tenderet artus