Epithalamium de nuptiis Honorii Augusti

Claudian

Claudian, Volume 1. Platnauer, Maurice, editor. Harvard University Press: Cambridge, MA; London, England, 1922.

  1. et flecti faciles Irae vinoque madentes
  2. Excubiae Lacrimaeque rudes et gratus amantum
  3. Pallor et in primis titubans Audacia furtis
  4. iucundique Metus et non secura Voluptas;
  5. et lasciva volant levibus Periuria ventis.
  6. quos inter petulans alta cervice Iuventas
  7. excludit Senium luco. Procul atria divae
  8. permutant radios silvaque obstante virescunt.
  9. Lemnius haec etiam gemmis extruxit et auro
  10. admiscens artem pretio trabibusque smaragdi
  11. supposuit caesas hyacinthi rupe columnas.
  12. beryllo paries et iaspide lubrica surgunt
  13. limina despectusque solo calcatur achates,
  14. in medio glaebis redolentibus area dives
  15. praebet odoratas messes; hic mitis amomi,
  16. hic casiae matura seges, Panchaeaque turgent
  17. cinnama, nec sicco frondescunt vimina costo
  18. tardaque sudanti prorepunt balsama rivo.
  19. Quo postquam delapsus Amor longasque peregit
  20. penna vias, alacer passuque superbior intrat.