de raptu Proserpinae

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. Faunorum Dryadumque dolor, complectitur ambas,
  2. sicut erant, alteque levat retroque solutis
  3. crinibus ascendit fastigia montis anheli
  4. exuperatque aestus et nulli pervia saxa
  5. atque indignantes vestigia calcat harenas :
  6. qualis pestiferas animare ad crimina taxos
  7. torva Megaera ruit, Cadmi seu moenia poscat
  8. sive Thyesteis properet saevire Mycenis :
  9. dant tenebrae manesque locum plantisque resultant
  10. Tartara ferratis, donec Phlegethontis ad undam
  11. constitit et plenos excepit lampade fluctus.
  12. Postquam perventum scopuli flagrantis in ora,
  13. protinus arsuras aversa fronte cupressus
  14. faucibus iniecit mediis lateque cavernas
  15. texit et undantem flammarum obstruxit hiatum.
    16. v.2.p.374
  16. compresso mons igne tonat claususque laborat
  17. Mulciber : obducti nequeunt exire vapores.
  18. coniferi micuere apices crevitque favillis
  19. Aetna no vis : strident admisso sulphure rami.
  20. tum, ne deficerent tantis erroribus, ignes