Carminum minorum corpusculum

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. ne iuveni parere velint. ceu flamine molli
    2. v.2.p.254
  2. tranquillisque fretis clavum sibi quisque regendum
  3. vindicat ; incumbat si turbidus Auster et unda
  4. pulset utrumque latus, posito certamine nautae
  5. contenti meliore manu seseque pavere
  6. confessi (finem studiis fecere procellae) :
  7. haud aliter Stilicho, fremuit cum Thracia belli
  8. tempestas, cunctis pariter cedentibus unus
  9. eligitur ductor ; suffragia quippe peregit
  10. iudex vera timor ; victus ratione salutis
  11. ambitus et pulsus iacuit formidine livor.
  12. Quis tibi tunc per membra tremor quantaeque cadebant
  13. ubertim lacrimae, cum saeva vocantibus arma
  14. iam lituis madido respectans lumina vultu
  15. optares reducem galeaeque inserta minaci
  16. oscula cristati raperes festina mariti !
  17. gaudia quae rursus, cum post victricia tandem
  18. classica sidereas ferratum pectus in ulnas
  19. exciperes, castae tuto per dulcia noctis
  20. otia pugnarum seriem narrare iuberes !