Carminum minorum corpusculum

Claudian

Claudian, Volume 2. Platnauer, Maurice, editor. Harvard University Press: Cambridge, MA; London, England, 1922.

  1. vulnere quae proprio facinus testata tyranni
  2. armavit patriae iustos in bella dolores
  3. exule Tarquinio, memorandaque concidit uno
  4. ulta pudicitiam libertatemque cruore.
  5. talia facta libens non tu virtute minore,
  6. sed fato meliore legis. Iam nubilis aetas
  7. principe sollicito votis erexerat aulam
  8. incertis, quem tanta tori fortuna maneret.
  9. Antiquos loquitur Musarum pagina reges,
  10. quod dura sub lege procos certare iuberent,
  11. empturos thalamum dubii discrimine leti,
  12. et sua crudeles gauderent pignora mortis
  13. ambitione peti. curru Pisaea marino
  14. fugit praeda Pelops ; nam perfidus obice regis
  15. prodidit Oenomai deceptus Myrtilus axem.
  16. Hippomenes trepidus cursu ferroque secutam
  17. aurato volucrem flexit Schoeneida pomo.