Parentalia
Ausonius, Decimus Magnus
Ausonius, Decimus Magnus. Ausonius, Volume 1. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1919.
- HACTENUS ut caros, ita iusto funere fletos
- functa piis cecinit nenia nostra modis,
- nunc dolor atque cruces nec contrectabile vulnus,
- coniugis ereptae mors memoranda mihi.
- nobilis a proavis et origine clara senatus,
- moribus atque bonis clara Sabina magis,
- te iuvenis primis luxi deceptus in annis
- perque novem caelebs te fleo Olympiadas.
- nec licet obductum senio sopire dolorem;
- semper crudescit nam mihi paene recens.