Mosella

Ausonius, Decimus Magnus

Ausonius, Decimus Magnus. Ausonius, Volume 1. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1919.

  1. Transieram celerem nebuloso flumine Navam,
  2. addita miratus veteri nova moenia Vinco,
  3. aequavit Latias ubi quondam Gallia Cannas
  4. infletaeque iacent inopes super arva catervae.
  5. unde iter ingrediens nemorosa per avia solum
  6. et nulla humani spectans vestigia cultus
  7. praetereo arentem sitientibus undique terris
  8. Dumnissum riguasque perenni fonte Tabernas
  9. arvaque Sauromatum nuper metata colonis:
  10. et tandem primis Belgarum conspicor oris
  11. Noiomagum, divi castra inclita Constantini.
  12. purior hic campis aer Phoebusque sereno
  13. lumine purpureum reserat iam sudus Olympum.
  14. nec iam, consertis per mutua vincula ramis,
  15. quaeritur exclusum viridi caligine caelum:
    16. v.1.p.226
  16. sed liquidum iubar et rutilam visentibus aethram
  17. libera perspicui non invidet aura diei.
  18. in speciem quin me patriae cultumque nitentis
  19. Burdigalae blando pepulerunt omnia visu,
  20. culmina villarum pendentibus edita ripis