Commemoratio Professorum Burdigalensium

Ausonius, Decimus Magnus

Ausonius, Decimus Magnus. Ausonius, Volume 1. Evelyn-White, Hugh G. (Hugh Gerard), editor. London, Cambridge, MA: William Heinemann, Ltd.; Harvard University Press, 1919.

  1. RHETORA Luciolum, condiscipulum atque magistrum
  2. collegamque dehinc, nenia maesta refer,
  3. facundum doctumque virum, seu lege metrorum
  4. condita seu prosis solveret orsa modis,
  5. eripuit patri Lachesis quem funere acerbo
  6. linquentem natos sexu in utroque duos:
  7. nequaquam meritis cuius responderit heres
  8. obscurus, quamvis nunc tua fama iuvet.
  9. Mitis amice, bonus frater, fidissime coniunx,
  10. nate pius, genitor: paenitet, ut fueris. [*]( 10)
  11. comis convivis, numquam inclamare clientes,
  12. ad famulos numquam tristia verba loqui,
  13. ut placidos mores, tranquillos sic cole manes
  14. et cape ab Ausonio munus, amice, vale.