Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. induere excelso caesi gestamina trunco
  2. ense subit, capuloque tenus ferrum impulit ira.
  3. uoluitur ille ruens atque arua hostilia morsu
  4. adpetit et mortis premit in tellure dolores.
  5. nec Gabaris Sicchaeque uirum tenuere furentes
  6. concordi uirtute manus; sed perdidit acer,
  7. dum stat, decisam Gabar inter proelia dextram;
  8. at Siccha auxilium, magno turbante dolore,
  9. dum temere accelerat, calcato improuidus ense
  10. succidit ac nudae sero uestigia plantae
  11. damnauit dextraque iacet morientis amici.
  12. tandem conuertit fatalia tela Nealcae
  13. fulminei gliscens iuuenis furor. exilit ardens
  14. nomine tam claro stimulante ad praemia caedis.
  15. tum silicem scopulo auulsum, quem montibus altis
  16. detulerat torrens, raptum contorquet in ora
  17. turbidus. incusso crepuerunt pondere malae,
  18. ablatusque uiro uultus: concreta cruento
  19. per nares cerebro sanies fluit, atraque manant
  20. orbibus elisis et trunca lumina fronte.