Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Phlegraeus tetigit trepidantia sidera uertex.
  2. Ecce inter medios belli praesagus, et ore
  3. attonito sensuque simul, clamoribus implet
  4. miles castra feris et anhelat clade futura:
  5. ‘Parcite, crudeles superi. iam stragis aceruis
  6. deficiunt campi. uideo per densa uolantem
  7. agmina ductorem Libyae currusque citatos
  8. arma uirum super atque artus et signa trahentem.
  9. turbinibus furit insanis et proelia uentus
  10. inque oculos inque ora rotat. cadit immemor aeui
  11. nequiquam, Trasimenne, tuis Seruilius oris
  12. subductus. quo, Varro, fugis? pro Iuppiter! ictu
  13. procumbit saxi fessis spes ultima Paulus.
  14. cesserit huic Trebia exitio. pons ecce cadentum
  15. corporibus struitur, reicitque cadauera fumans
  16. Aufidus, ac uictrix insultat belua campis.
  17. gestat Agenoreus nostro de more secures
  18. consulis, et sparsos lictor fert sanguine fasces.
  19. in Libyam Ausonii portatur pompa triumphi.
  20. o dolor! hoc etiam, superi, uidisse iubetis?