Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. canitiem et longos finiuit morte labores.
  2. nec minus Herminium primis obtruncat in armis,
  3. adsuetum, Trasimenne, tuos praedantibus hamis
  4. exhaurire lacus patriaeque alimenta senectae
  5. ducere suspenso per stagna iacentia lino.
  6. interea exanimem maesti super arma Sychaeum
  7. portabant Poeni corpusque in castra ferebant.
  8. quos ubi conspexit tristi clamore ruentis
  9. ductor, praesago percussus pectora luctu,
  10. Quinam inquit ‘dolor, o socii, quemue ira deorum
  11. eripuit nobis? num te, dulcedine laudis
  12. flagrantem et nimio primi Mauortis amore
  13. atra, Sychaee, dies properato funere carpsit?’
  14. utque dato gemitu lacrimae adsensere ferentum
  15. et dictus pariter caedis maerentibus auctor,
  16. Cerno ait ‘aduerso pulchrum sub pectore uulnus
  17. cuspidis Iliacae. dignus Carthagine, dignus
  18. Hasdrubale ad manis ibis, nec te optima mater
  19. dissimilem lugebit auis, Stygiaue sub umbra
  20. degenerem cernens noster uitabit Hamilcar.