Punica
Silius Italicus, Tiberius Catius
Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.
- causa Sychaeus erat. Murranum ille eminus hasta
- perculerat, quo non alius, cum bella silerent,
- dulcius Oeagrios pulsabat pectine neruos.
- occubuit silua in magna patriosque sub ipso
- quaesiuit montis leto ac felicia Baccho
- Aequana et Zephyro Surrentum molle salubri.
- addiderat misero comitem pugnaeque ferocis
- gaudebat tristi uictor nouitate Sychaeus.
- palantis nam dum sequitur, peruaserat altam
- in siluam et priscae reclinis ab ictibus ulmi
- terga tuebatur trunco frustraque relictos
- Tauranus comites suprema uoce ciebat.
- transegit iuuenem ac perfossis incita membris
- haesit in opposito cuspis Sidonia ligno.
- Quid uobis, quaenam ira deum, uel mente sinistra
- quae sedit formido, uiri? qui Marte relicto
- ramorum quaesistis opem. non aequus in artis
- nimirum rebus suasor metus. arguit asper
- exitus euentu praui consulta timoris.
- annosa excelsos tendebat in aethera ramos