Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. Regulus inflabant ueteri praecordia fama.
  2. Marte probare genus factisque Lacona parentem
  3. ardebant gelidosque dehinc inuisere montis
  4. Taygeta et tandem bellis innare subactis
  5. Eurotan patrium ritusque uidere Lycurgi.
  6. sed Spartam penetrare deus fratresque negarunt
  7. Ausonii, totidem numero, quos miserat altis
  8. Egeriae genitos immitis Aricia lucis,
  9. aetatis mentisque pares; at non dabat ultra
  10. Clotho dura lacus aramque uidere Dianae.
  11. namque ut in aduersos impacti turbine pugnae
  12. Eumachus et Critias et laetus nomine patris
  13. Xanthippus iunxere gradus, (ceu bella leones
  14. inter se furibunda mouent et murmure anhelo
  15. squalentis campos ac longa mapalia complent:
  16. omnis in occultas rupis atque auia pernix
  17. Maurus saxa fugit, coniunxque Libyssa profuso
  18. uagitum cohibens suspendit ab ubere natos;
  19. illi dira fremunt, perfractaque in ore cruento
  20. ossa sonant, pugnantque feris sub dentibus artus)