Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. et sua fatidico repetebat nomina luco.
  2. haec ignara uiri uacuoque adsueta cubili
  3. uenatu et siluis primos defenderat annos;
  4. non calathis mollita manus operataue fuso
  5. Dictynnam et saltus et anhelum impellere planta
  6. cornipedem ac strauisse feras immitis amabat.
  7. quales Threiciae Rhodopen Pangaeaque lustrant
  8. saxosis nemora alta iugis cursuque fatigant
  9. Hebrum innupta manus: spreti Ciconesque Getaeque
  10. et Rhesi domus et lunatis Bistones armis.
  11. Ergo habitu insignis patrio, religata fluentem
  12. Hesperidum nodo crinem dextrumque feroci
  13. nuda latus Marti ac fulgentem tegmine laeuam
  14. Thermodontiaca munita in proelia pelta,
  15. fumantem rapidis quatiebat cursibus axem.
  16. pars comitum biiugo curru, pars cetera dorso
  17. fertur equi; nec non Veneris iam foedera passae
  18. reginam cingunt, sed uirgine densior ala est.
  19. ipsa autem gregibus per longa mapalia lectos
  20. ante aciem ostentabat equos, tumulumque propincum