Punica

Silius Italicus, Tiberius Catius

Silius Italicus. Corpus Poetarum Latinorum, Vol 2. Summers, Walter Coventry, editor. Postgate, John Percival, editor. London: G. Bell et Filiorum, 1905.

  1. transfixus gladio propere accurrentis Amorgi
  2. occidit, immoriens magnis non prosperus ausis.
  3. Haec inter, ueluti nondum satiasset Enyo
  4. iras saeua truces, sublatum puluere campum
  5. Vulturnus rotat et candentis torquet harenas.
  6. iamque reluctantis stridens immane procella
  7. per longum tulit ad campi suprema cauisque
  8. adflictos ripis tumidum demersit in amnem.
  9. hic tibi finis erat, metas hic Aufidus aeui
  10. seruabat tacito, non felix Curio, leto.
  11. namque, furens animi dum consternata moratur
  12. agmina et oppositu membrorum sistere certat,
  13. in praeceps magna propulsus mole ruentum
  14. turbatis hauritur aquis fundoque uolutus
  15. Hadriaca iacuit sine nomine mortis harena.
  16. Ingens ferre mala et Fortunae subdere colla
  17. nescius, aduersa fronte incurrebat in arma
  18. uincentum consul: pereundi Martius ardor
  19. atque animos iam sola dabat fiducia mortis,
  20. cum Viriathus agens telis, regnator Hiberae