Saturae

Juvenal

Juvenal. Juvenal and Persius. Ramsay, G. G., editor. London, New York: William Heinemann, G. P. Putnam's Sons, 1918.

  1. hospitis adfectu dominum regemque salutat,
  2. et cum venali Cyane succincta lagona.
  3. Defensor culpae dicet mihi ‘fecimus et nos
  4. haec iuvenes.’ esto, desisti nempe nec ultra
  5. fovisti errorem, breve sit quod turpiter audes;
  6. quaedam cum prima resecentur crimina barba,
  7. indulge veniam pueris: Lateranus ad illos
  8. thermarum calices inscriptaque lintea vadit
  9. maturus bello Armeniae Syriaeque tuendis
  10. amnibus et Rheno atque Histro; praestare Neronem
  11. securum valet haec aetas, mitte Ostia, Caesar,
  12. mitte, sed in magna legatum quaere popina;
  13. invenies aliquo cum percussore iacentem,
  14. permixtum nautis et furibus ac fugitivis,
  15. inter carnifices et fabros sandapilarum
  16. et resupinati cessantia tympana galli,
  17. aequa ibi libertas, communia pocula, lectus
  18. non alius cuiquam, nec mensa remotior ulli.
  19. quid facias talem sortitus, Pontice, servum?
  20. nempe in Lucanos aut Tusca ergastula mittas.