Priapeia
Priaepia
Poeta Latini minores, ed. Aemilius Baehrens, Leipzig, Teubner, 1879
- Praedictum tibi ne negare possis:
- si fur ueneris, inpudicus exis.
- Si quot habes uersus, tot haberes poma, Priape,
- esses antiquo ditior Alcinoo.
- Quid frustra quereris, colone, mecum,
- quod quondam bene fructuosa malus
- autumnis sterilis duobus adstem?
- non me praegrauat, ut putas, senectus,
- nec sum grandine uerberata dura,
- nec gemmas modo germine exeuntes
- seri frigoris ustulauit aura,
- nec uenti pluuiaeue siccitasue,
- quod de se quererer, malum dederunt;
- non sturnus mihi graculusue raptor
- aut cornix anus aut aquosus anser
- aut coruus nocuit siticulosus:
- sed quod carmina pessimi poetae
- ramis sustineo laboriosis.
- Securi dormite, canes: custodiet hortum
- cum sibi dilecta Sirius Erigone.