Argonautica
Valerius Flaccus, Gaius
Valerius Flaccus. C. Valeri Flacci Setini Balbi Argonauticon Libri Octo. Kramer, Otto, editor. Leipzig: Teubner, 1913.
- arma umeris. regem inde petens superabat ovante[*](ovante Bon. 1, ouant V )
- litora tuta gradu, qualis per pascua victor
- ingreditur, tum colla[*](cum colla C | armis V, artus C ) tumens, tum celsior armis
- taurus, ubi adsueti pecoris stabula alta revisit
- et patrium nemus[*](patrium nemus M r, patrum nemos V ) et bello quos ultus amores.
- Obvia cui contra longis emissa tenebris
- turba Phrygum[*](phrygum XM r, phrygaim V ) parvumque trahens cum coniuge natum
- Laomedon; iam maestus equos, iam debita posci
- dona gemit. pars aerii fastigia muri
- cingit et ignotis iuvenem mirantur in armis.
- illum torva tuens atque acri lubricus astu
- rex subit et patrio fatur male laetus amore:
- 'maxime Graiugenum, quem non Sigea petentem[*](petentem S, patentem V )
- litora nec nostrae miserantem funera Troiae
- adpulit his fors ipsa locis, si vera parentem
- fama Iovem summique tibi genus esse Tonantis,[*](tonantis S, donantis V )
- noster ades iunctisque venis: sator unus et idem
- stirpis honos, quamquam longis disiungimur oris.
- quot mihi post lacrimas, post quanta piacula patrum
- serus ades, quam parva tuis iam gloria factis.
p.51