Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. ille modo infernae nequiquam flumina Lethes
  2. incorrupta rogat, nunc anxius omnibus aris
  3. inlacrimat signatque fores et pectore terget
  4. limina; nunc magni vocat exorabile numen
  5. Caesaris, heu durus fati tenor! estne quod illi
  6. non liceat? quantae poterant mortalibus annis
  7. accessisse morae, si tu, pater, omne teneres
  8. arbitrium? caeco gemeret Mors elusa barathro
  9. longius et vacuae posuissent stamina Parcae.
  10. Iamque cadunt vultus oculisque novissimus error
  11. obtunsaeque aures, nisi cum vox sola mariti
  12. noscitur; illum unum media de morte reversa
  13. mens videt, illum aegris circumdat fortiter ulnis
  14. immotas obversa genas, nec sole supremo
  15. lumina, sed dulci mavult satiare marito.
  16. tum sic unanimum moriens solatur amantem:
  17. ‘pars animae victura meae, cui linquere possim
  18. o utinam, quos dura mihi rapit Atropos, annos:
  19. parce, precor, lacrimis, saevo ne concute planctu
  20. pectora, nec crucia fugientem coniugis umbram.