Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. quid laudem litus [*]() libertatemque Menandri,
  2. quam Romanus honos et Graia licentia miscent?
  3. nec desunt variae circa oblectamina vitae:
  4. sive vaporiferas blandissima litora, Baias,
  5. enthea fatidicae seu visere tecta Sibyllae
  6. dulce sit Iliacoque iugum memorabile remo,
  7. seu tibi Bacchei vineta madentia Gauri
  8. Teleboumque domos, trepidis ubi dulcia nautis
  9. lumina noctivagae tollit Pharus aemula lunae,
  10. caraque non molli iuga Surrentina Lyaeo,
  11. quae meus ante alios habitator Pollius auget,
  12. Aenarumque [*]() lacus medicos Stabiasque renatas:
  13. mille tibi nostrae referam telluris amores?
  14. sed satis, hoc, coniunx, satis est dixisse: creavit
  15. me tibi. me socium longos adstrinxit in annos,
  16. nonne haec amborum genetrix altrixque videri
  17. digna? sed ingratus qui plura adnecto tuisque
  18. moribus indubito: venies, carissima coniunx.
  19. praeveniesque etiam; sine me tibi ductor aquarum
  20. Thybris et armiferi sordebunt tecta Quirini.