Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. ast ego, Dardaniae quamvis sub collibus Albae
  2. rus proprium magnique ducis mihi munere currens
  3. unda domi curas mulcere aestusque levare
  4. sufficerent, notas Sirenum nomine rupes
  5. facundique larem Polli non hospes habebam,
  6. assidue moresque viri pacemque novosque
  7. Pieridum flores intactaque carmina discens.
  8. forte diem Triviae dum litore ducimus udo
  9. angustasque fores adsuetaque tecta gravati
  10. frondibus et patula defendimus arbore soles,
  11. delituit caelum et subitis lux candida cessit
  12. nubibus ac tenuis graviore favonius austro
  13. immaduit; qualem Libyae Saturnia nimbum
  14. attulit, Iliaco dum dives Elissa marito
  15. donatur testesque ululant per devia nymphae.
  16. diffugimus. festasque dapes redimitaque vina
  17. abripiunt famuli: nec quo convivia migrent,
  18. quamvis innumerae gaudentia rura superne
  19. insedere domus et multo culmine dives
  20. mons nitet: instantes sed proxima quaerere nimbi