Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. protectura hiemes atque exclusura pruinas,
  2. indomitusque silex curva fornace liquescit.
  3. praecipuus sed enim labor est exscindere dextra
  4. oppositas rupes et saxa negantia ferro,
  5. hic pater ipse loci positis Tirynthius armis
  6. insudat validaque solum deforme bipenni,
  7. cum grave nocturna caelum subtexitur umbra,
  8. ipse fodit, ditesque Caprae [*]() viridesque resultant
  9. Taurubulae, et terris ingens redit aequoris echo,
  10. non tam grande sonat motis incudibus Aetne,
  11. cum Brontes Steropesque ferit, nec maior ab antris
  12. Lemniacis fragor est. ubi flammeus aegida cadat
  13. Mulciber et castis exornat Pallada donis,
  14. decrescunt scopuli, et rosea sub luce reversi
  15. artifices mirantur opus. vix annus anhelat
  16. alter, et ingenti dives Tirynthius arce
  17. despectat fluctus et iunctae tecta novercae
  18. provocat et dignis invitat Pallada templis,
  19. iam placidae dant signa tubae, iam fortibus ardens
  20. fumat harena sacris, hos nec Pisaeus honores