Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. hic puer e turba volucrum, cui plurimus ignis
  2. ore manuque levi numquam frustrata sagitta,
  3. agmine de medio tenera sic dulce profatur
  4. voce—pharetrati pressere silentia fratres.
  5. ‘Scis ut, mater," ait " nulla mihi dextera segnis
  6. militia; quemcumque hominum divumque dedisti,
  7. uritur, at quondam lacrimis et supplice dextra
  8. et votis precibusque virum concede moveri,
  9. o genetrix: duro nec enim ex adamante creati,
  10. sed tua turba sumus, clarus de gente Latina
  11. est iuvenis, quem patriciis maioribus ortum
  12. nobilitas gavisa tulit praesagaque formae
  13. protinus c nostro posuit cognomina caelo,
  14. hunc egomet tota quondam—tibi dulce—pharetra
  15. improbus et densa trepidantem cuspide fixi.
  16. quamvis Ausoniis multum gener ille petitus
  17. matribus, edomui victum dominaeque potentis
  18. ferre iugum et longos iussi sperare per annos,
  19. ast illam summa leviter—sic namque iubebas—
  20. lampade parcentes et inerti strinximus arcu.