Silvae

Statius, P. Papinius (Publius Papinius)

Statius, P. Papinius. Statius, Volume 1. Mozley, John Henry, editor. London: William Heinemann; New York: G.P. Putnam's Sons, 1928.

  1. Quae superimposito moles geminata colosso
  2. stat Latium complexa forum? caelone peractum
  3. fluxit opus? Siculis an conformata caminis
  4. effigies lassum Steropem Brontemque reliquit?
  5. an te Palladiae talem, Germanice, nobis
  6. effinxere manus, qualem modo frena tenentem
  7. Rhenus et attoniti vidit domus ardua Daci?
  8. Nunc age Fama prior notum per saecula nomen
  9. Dardanii miretur equi, cui vertice sacro
  10. Dindymon et caesis decrevit frondibus Ide:
  11. hunc neque discissis cepissent Pergama muris
  12. nec grege permixto pueri innuptaeque puellae
  13. ipse nec Aeneas nec magnus duceret Hector!
  14. adde, quod ille nocens saevosque amplexus Achivos,
  15. hunc mitis commendat eques: iuvat ora tueri
  16. mixta notis belli placidamque gerentia pacem,
  17. nec veris maiora putes: par forma decorque,
  18. par honor, exhaustis Martem non altius armis
  19. Bistonius portat sonipes magnoque superbit
  20. pondere nec tardo [*]() raptus prope flumina cursu