Thebais

Statius, P. Papinius (Publius Papinius)

Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.

  1. ille ibit, minus ipse voles.’ sic ignea lora
  2. cum daret et rapido Sol natum imponeret axi,
  3. gaudentem lacrimans astra insidiosa docebat
  4. nolentesque teri zonas mediamque polorum
  5. temperiem: pius ille quidem et formidine cauta,
  6. sed iuvenem durae prohibebant discere Parcae.
  7. Oebalios sublimis agit, spes proxima palmae,
  8. Amphiaraus equos; tua furto lapsa propago,
  9. Cyllare, dum Scythici diversus ad ostia Ponti
  10. Castor Amyclaeas remo permutat habenas.
  11. ipse habitu niveus, nivei dant colla iugales,
  12. concolor est albis et cassis et infula cristis,
  13. quin et Thessalicis felix Admetus ab oris
  14. vix steriles compescit equas; Centaurica dicunt
  15. semina (credo, adeo sexum indignantur, et omnis
  16. in vires adducta venus); noctemque diemque
  17. adsimulant, maculis internigrantibus albae:
  18. tantus uterque color, credi nec degener illo
  19. de grege, Castaliae stupuit qui sibila cannae
  20. laetus et audito contempsit Apolline pasci.