Thebais

Statius, P. Papinius (Publius Papinius)

Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.

  1. Tertius horrentem zephyris laxaverat annum
  2. Phoebus et angustum cogebat limite verno [*]()
  3. longius ire diem, eum fracta impulsaque fatis
  4. consilia et tandem miseri data copia belli,
  5. prima manu rutilam de vertice Larissaco
  6. ostendit Bellona facem dextraque trabalem
  7. hastam intorsit agens, liquido quae stridula caelo
  8. fugit et Aoniae celso stetit aggere Dirces.
  9. mox et castra subit ferroque auroque coruscis
  10. mixta viris turmale fremit; dat euntibus enses,
  11. plaudit equos, vocat ad portas; hortamina fortes
  12. praeveniunt, timidisque etiam brevis addita virtus.
  13. Dicta dies aderat, cadit ingens rite Tonanti
  14. Gradivoque pecus, nullisque secundus in extis
  15. pallet et armatis simulat sperare sacerdos.
  16. iamque suos circum pueri nuptaeque patresque
  17. funduntur mixti summisque a postibus obstant.
  18. nec modus est lacrimis: rorant clipeique iubaeque
  19. triste salutantum, et cunctis dependet ab armis
  20. suspiranda domus; galeis iuvat oscula clusis