Thebais
Statius, P. Papinius (Publius Papinius)
Statius, P. Papinius. Statius, Volumes 1-2. Mozley, John Henry, editor. London: William Heinemann; New York: G.P. Putnam's Sons, 1928.
- indignans veniam, qualis leo rupe sub alta,
- quem viridem quondam silvae montesque [*]() tremebant,
- iam piger et longo iacet exarmatus ab aevo,
- magna tamen facies et non adeunda senectus;
- et si demissas veniat mugitus ad aures,
- erigitur meminitque sui, viresque solutas[*]()
- ingemit et campis alios regnare leones.
- Flectitur adfatu, sed non tamen omnia rector
- supplicis indulget lacrimis partemque recidit
- muneris. haud, inquit, ‘patriis prohibebere longe
- finibus, occursu dum non pia templa domosque
- commacules. habeant te lustra tuusque Cithaeron;
- atque haec ecce tuis tellus habitabilis umbris,
- qua bellum geminaeque iacent in sanguine gentes.’
- sic ait, et ficto comitum volgique gementis
- adsensu limen tumidus regale petebat.
- Interea pulsi vallum exitiale Pelasgi
- destituunt furto; nulli sua signa suusque
- ductor: eunt taciti passim et pro funere pulchro
- dedecorem amplexi vitam reditusque pudendos.